Logo

UNHA VIDA EN PROL DA LOITA

Letras que nos lembran O NADAL e todo o típico destas datas festivas:

* *

AUTOR: Amado Carballo _____________________________________________________________________________________

" Comentario: Como era de esperar, o Neno Xesús vai conformar a principal temática das panxoliñas:

QUE VIVA
(Disco: É Nadal)

Fariña leviá da lúa
aboiando polo ar.
Neve de estreliñas mozas
que se chapuzan no mar.

Que viva, que viva,
que reine, que reine,
o Verbo encarnado
que é o Rei dos Reises.

Bailan as verdes cantigas,
con estreliñas nas mans,
unha nova muiñeira,
vestidiñas de luar.

Que viva, que viva,
que reine, que reine,
o noso meniño,
que é o Rei dos Reises.

A gaita deita pingotas
como chuvia estrelecida,
envolta nos seus salaios
voan ao ceo as cantigas.

Que viva, que viva,
que reine, que reine,
o Deus feito carne
que é o Rei dos Reises.

Encol das nubes vagantes,
van as coplas polo val,
adormecidas no berce
da donda paz aldeá.

Que viva, que viva,
que reine, que reine,
o Señor dos ceos
que é o Rei dos Reises.

O tambor riza o silencio,
as cunchas, rañan as tebras,
o bombo maza no coiro
da noitiña rebuldeira.

Que viva, que viva,
que reine, que reina
o fillo da vida,
que é o Rei dos Reises.

Esta noite é Noiteboa
de alalás e de ruada.
Brinca a lúa polo ceo
tecendo unha ribeirana.

Que viva, que viva,
que reine, que reine,
o fermoso neno,
que é o Rei dos Reises.

 

AUTOR: Bouza Brey, Fermín ____________________________________________________________________________________

NOITE DAS NOITES
(Disco: É Nadal)


Noite das Noites en Belén!
Fun pegureiro no Portal,
levei un chifro de alcacén
e unha fogaza candeal.

Canto anxeliño a recrear!
Cantas estrelas de arredor!
E canta almiña a se salvar
ao pé do Neno Redentor!

Noite das Noites en Belén!
Un vello cego de Xudá
cantaba un ledo leixaprén,
louvando á Eterna Craridá!

Canto anxeliño a recrear!
Cantas estrelas de arredor!
E canta almiña a se salvar
ao pé do Neno Redentor!

Noite das Noites en Belén!
Misterio inmenso que alí vin!
Foi alborada para min
e mais pra vós. Amén. Amén!

* *


AUTOR: Casas, Augusto ________________________________________________________________________________________

 

CANZÓN DA NOITE DE NADAL
(Disco: É Nadal)

A Lúa nos piñeiraes
resoa coma unha gaita
i-os anxos con aas de neve
polos outos montes cantan.

O río parece un neno,
ai lalalá...
un loiro neno dormido
cunha sorrisa moi branca...

A terra faise tan lene,
ai lalalá...,
que para voar ao ceo
unha estreliña lle basta.

* *


AUTOR: Ferreiro, Celso Emilio __________________________________________________________________________________

BAIXO OS TELLADOS DA NOITE
(Disco: É Nadal)


Baixo os tellados da noite
cabalgan os Reises Magos.

Unha estreliña pequeniña
vaille os vieiros marcando,
i o vento marcha dediante
para avisar ao ben nado.

Baixo os tellados da noite
cabalgan os Reises Magos.

No lusco- fusco da ialba
rechouchían os paxaros.
A Virxen arrola ao neno
o boi quentao co seu bafo.

Baixo os tellados da noite
cabalgan os Reises Magos.

Pombas con azas de neve
vanse na rúa pousando.
Nos seus cabalos da lúa
xa chegan os Reises Magos.

Baixo os tellados da noite
cabalgan os Reises Magos.

* *


AUTOR: Losada Diéguez, Antón _________________________________________________________________________________

 

ANO NOVO
(Disco: É Nadal)

Ano novo, vida nova
Ano novo ¿que traerá?
O vello sospiros leva.
O novo ¿que levará?

Ano que de festa naces,
o pasado xa pasou.
E a primavera enverdece
o xardín que se murchou.

Mais sei d'abondo ano novo
có tempo que se vai indo.
Pra sempre leva o cheirume
das froles que van caíndo.

Ano novo, vida nova.
Ano novo, outro virá.
O vello sospiros leva.
O novo xa os traerá.

* *



AUTOR: Pita, Emilio __________________________________________________________________________________________

O RODÍN RONDIÑO
(Disco: É Nadal)


O rondín rondiño
dos catro paxaros
e un caraveliño.

Nun vello sabugueiro
o ledo verderol,
alinda de lelias
o berce verde e mol.

A carón da queiroa
e do toxo belido
o pimpín viribín,
aleda o herbal frolido.

Doa souril o melro
folias arrufadas,
i escintilan na noite
peroliñas pingadas.

Nalbariza dourada,
alborada doncel
o mazarico pica
a cántiga do mel.

* *

AUTOR: Sigüenza, Xulio _______________________________________________________________________________________

ALÁ VEN
(Disco: É Nadal)


Alá ven o vento
pola noite fría;
alá ven o vento
cantarlle a María.

Alá ven a lúa
xeitosa de lus;
alá ven a lúa
cantarlle a Xesús.

Alá ven a réboa
lixeira de pé;
alá ven a néboa
cantarlle a Xosé.

* *


AUTOR: Valle-Inclán, Ramón María del ___________________________________________________________________________

SOBRE O SOL
(Discos: É Nadal/ Lembranzas)


Sobre o sol e a lúa
Voa un paxariño
Que leva unha rosa
Pra Xesús Meniño.

Paxariño louro,
gaiteiriño lindo,
cántame no peito
que o teño ferido.

Cántame no peito,
gaiteiriño lindo
que con Xesús falas
no teu asobío.

Pola mañán cedo,
lindo reiseñol,
hai na túa cantiga
orballo de frol.

Orballiño fresco
nas pallas do día,
orballiño, gracia
da Virxe María.

* *


AUTORA: Vázquez, Dora _______________________________________________________________________________________

MEU CARAVELIÑO
(Disco: É Nadal)


¡Coitado, coitado,
meu caraveliño!
Nasciche nas pallas.
Non houbo outro niño...

Renxia a xiada
en cristáis de frío,
e o teu tenro corpo
estaba espidiño.

¿Por que, sendo Rei,
nasciche probiño?
¡Coitado, coitado,
meu caraveliño!

¡Como Ti me does
a min, meu ruliño,
que tamén de pallas
che tiven o niño!

 

A VIRXEN LAVA
(Disco: É Nadal)

A Virxen lava que lava,
a Virxen lavando está.
Escumiñas volandeiras
cánlle polo delantal.

Rosiñas e silvas,
romeiros en fror.
¡Que son os paniños
do Noso Señor!

A Virxen, lavando, canta...
Canta mainiño ao lavar
os paniños do seu Neno
pra poñelos a enxugar.

Paxariños lle fan rolda
rechouchíos a cantar,
mira que mira, mirando
rosas nascer e voar.

Rosiñas e silvas,
romeiros en fror.
¡Que son os paniños
do Noso Señor!

A Virxen lava que lava,
a Virxen lavando está.
Rosas lle fuxen das mans.
¡Xesús llas fará voar!


É NADAL
(Disco: É Nadal)

¡Tan... tan...!
Campaíña, desfolla un cantar.
Bule e rebule,
batelar de bronces
choutando no ár.

¡Canta, campaíña!
Que os anxos rebrincan
onda o teu badal,
ceibando anaquiños de groria
no repinicar.

¡Canta, campaíña!
Desfolla un cantar...
¡Tan, tan!... Polo vales.
¡Tan, tan!... Polo ár.
¡Tan, tan!... polas leiras.
¡Tan, tan!... Polo mar...

Nos fíos da alba,
¡que groria non tras!
Túa música canta:
¡É Nadal!...
¡É Nadal!...
¡É Nadal!...

* *


AUTORA: Vázquez, Pura _______________________________________________________________________________________

O DEUS PROBIÑO
(Disco: É Nadal)


Panos de inxeles puntilas
e sabáns de liño quero,
para envolver ao probiño
neno bunito do ceo.

¡Ay, qué doce, qué pequeno,
iste amor dos meus amores!
¡Poñéille no berce duro,
tenruras de beixo e frores!

¡Poñéille lan da máis fina
na tépeda cabeceira;
e aledáille a Noite Boa
con gaitas e pandeiretas!

¡Facéime doce regazo,
Señor, pra iste pequeniño!
Pra que poda acobexalo,
facéime frol, pruma ao niño!

¡Vinde todos, vinde axiña,
romeiros dos mil camiños!
¡A estrela aluma en Belén
ao Deus de azúes olliños!

O NENO DEUS
(Disco: É Nadal)

Peitaliños,
pillariñas,
froliñas
e folerpiñas
quero darlle
ao Neno Deus...
Pisadas de anxos,
aziñas,
e sorrisos
e raíñas
quero darlle
ao Neno Deus.
Quero darlle
esa lizgaira
pombiña,
que na mazaira
axexa
pra o Neno Deus.
E un xílgaro,
un pardaliño,
unha mapoula,
un carriño,
unha estreliña
do ceo,
pra que enrede
o Neno Deus...


ISTE RAPACIÑO
(Disco: É Nadal)

Iste rapaciño
que no berce dorme,
é un caraveliño
tremando na noite.

Tremando na noite,
non o hai coma él...
¡Que o diga María
que o cante Xosé!

¡Xesús, Xesusiño!
¡Meu Deus pequechiño...!
¡Que pallas sin frores
mágoanche o corpiño,
amor dos amores!

Tan pequerrechiño,
non o hai coma él...
¡Que o diga María!
¡Que o anuncie Gabriel!


LOUVADIÑO SEA
(Disco: É Nadal)

Ea, ea, ea,...
Xesús xa nascéu...
¡Louvadiño sea!

Ai, lalalá.
Ai, lalaló.
Ai, lelolaralá.
Ai, lalalaralaló...

Ea, ea, ea...
O Neno no berce.
No Portal, a estrela.

Ai, lalalá.
Ai, lalaló.
Ai, lelolaralalá.
Ai, lalalaralaló...